कोशीमा कांग्रेसका मन्त्रीले दिए राजीनामा

नेपाली कांग्रेस कोशी प्रदेश सरकारबाट बाहिरिएको छ। कोशीमा मन्त्री रहेका कांग्रेस नेताहरुले बुधबार सामूहिक रुपमा मुख्यमन्त्री हिक्मत कार्की समक्ष राजीनामा बुझाएका छन्।

कोशी प्रदेशमा कांग्रेसबाट भौतिक पूर्वाधार विकासमन्त्री प्रदीप सुनुवार, स्वास्थ्यमन्त्री मानबहादुर लिम्बु, उद्योग, कृषि तथा सहकारीमन्त्री इस्राइल मन्सुरी, पर्यटन, वन तथा वातावरणमन्त्री भीम पराजुली र भौतिक पूर्वाधार विकास राज्यमन्त्री शोभा चेम्जोङ सरकारमा सहभागी थिए। 

कांग्रेस २०८१ भदौ २ गते कोशी प्रदेश सरकारमा सहभागी भएको थियो। एमाले र नेकपाले साउन ९ मा प्रदेश सरकारहरु मिलेर चलाउन ३ बुँदे सहमति गरेपछि एमाले र कांग्रेसबीचको सहकार्य टुटेको थियो। 
नेकपा एमाले र नेकपाबीच सत्ता समीकरण बनेपछि कोशीका मन्त्रीलाई राजीनामा दिन दबाब थियो।
 
कांग्रेसका मन्त्रीहरु बाहिरिएपछि कोशी प्रदेश सरकारमा पुन नेकपाको प्रवेश हुने भएको छ। 
कांग्रेस सरकारबाट बाहिरिएपछि अब एमाले र नेकपाबीच बनेको नयाँ समीकरणअनुसार कोशी प्रदेश सरकार पुर्नगगठनको प्रक्रिया अघि बढ्ने भएको छ। 

केन्द्रको सत्ता समीकरण परिवर्तनसँगै प्रदेशहरुमा सरकार फेरबदलको क्रम तीव्र बनेको छ। 

कोशीमा कुल ९३ जना सांसदमध्ये एक जना सभामुख र एक जना उपसभामुख छन्। जसमध्ये तीन वर्षको अवधिमै भन्डै आधा सांसद मन्त्री बनिसकेका छन्। तीन वर्षमा तीन जना मुख्यमन्त्री फेरिएका छन्। 
प्रदेशसभामा एमालेका ४० (उपसभामुख सिहत), कांग्रेसका २९, माओवादीमा १३, राप्रपाका ६ (सभामुखसहित), नेकपा एकीकृत समाजवादीमा ४ र जसपाका १ सांसद छन्। 

सरकार गठनका लागि र बहुमत प्राप्त गर्नका निम्ति ४७ जना सांसदको आवश्यकता पर्छ।